Félag um stafrænt frelsi á Íslandi

Prjónaskapur og stafrænt frelsi

Einu sinni voru það bara örfáir sem kunnu að prjóna, og þeir sem það kunnu vildu halda því þannig. Með því að halda þekkingunni út af fyrir sig gátu þau tryggt sér næga vinnu og góða afkomu við að prjóna úrvalsflíkur á meðan aðrir gengu um í þæfðum feltflíkum úr lélegri ull og handofnu lérefti.

Margir telja að prjónaskapur hafi átt sér stað í þúsundir ára, en raunin er sú að prjónaskapur eins og hann er þekktur í dag varð til á endurreisnartímabilinu, og eldri flíkur, til dæmis frá landnámsöld, voru gerðar með annarri aðferð sem kallast vattarsaumur.

Nútíma prjónaskapur var fundinn upp í miðausturlöndum og barst til Evrópu í gegnum sérstök prjónagildi, þar sem eingöngu karlmenn unnu og prjónuðu allan daginn. Prjónaðar vörur voru eftirsóttar en þar sem fáir kunnu iðnina voru þær dýrar. Lengi vel var eingöngu konungsfólk og lénsherrar sem gátu klæðst prjónuðum flíkum.

En það er ekki flókið að prjóna eins og menn áttuðu sig á þegar þeir fóru að skoða þessar vörur, og fólki tókst að frelsa þessa lokuðu þekkingu og dreifa henni út í samfélagið. Prjónagildin hrundu og prjónaflíkur féllu úr tísku hjá konungsfólkinu en allir gátu nú klæðst hlýjum lopapeysum.

Smám saman urðu til rithættir fyrir prjónauppskriftir, eins konar nótnablöð fyrir listamenn með prjóna. En prjónablöð voru fyrst um sinn efin út fyrst og fremst af framleiðendum garnsins, sem héldu aftur mikilvægum upplýsingum í uppskriftum sínum til þess að lesendur voru að stóru leyti tilneyddir til að kaupa garn frá þeim.

Kona að nafni Elisabeth Zimmerman, sem var fræg fyrir handiðnir sínar, var ráðin af garnframleiðanda til að hanna peysu. Hún útbjó flíkina og nákvæmar leiðbeiningar um framleiðsluferlið – kóðann að peysunni, ef svo mætti að orði komast – og fyrirtækið breytti uppskriftinni á þann veg að ekki væri auðvelt að búa til peysuna með öðru garni en þeirra eigin.

Elisabeth varð svo reið yfir þessu að hún stofnaði sitt eigið útgáfufyrirtæki og gaf út uppskriftir sínar með öllum tiltækum upplýsingum ásamt uppástungum um breytingar þar sem sköpunargleðin fengi að njóta sín. Þekkingin dreifðist.

Hliðstæða við þessa sögu á sér nú stað í tölvukerfum nútímans. Fyrirtæki sem þróa hugbúnað sjá sér hag í því að fela sínar aðferðir fyrir almenningi. Lokaður hugbúnaður felur mikið af þeim möguleikum sem eru til staðar í tölvunum. Rétt eins og garnframleiðendurnir földu mikilvægar upplýsingar til að tryggja sína markaðsstöðu þá hafa
hugbúnaðarframleiðendur komið sér upp lokuð gagnasnið þannig að ekki er hægt að skipta um hugbúnað; að þegar þú hefur einu sinni valið að nota hugbúnað frá tilteknu fyrirtæki þá getir þú ekki skipt nema að glata öllum þeim upplýsingum sem hafa orðið til með notkun þess.

Félag um stafrænt frelsi á Íslandi vill að gagnasnið séu opin, svo að framleiðsluaðferðirnar á ullarpeysum framtíðarinnar séu öllum aðgengilegar.

Staða mála hjá FSFÍ – tilkynning til félagsmanna

Sæl öllsömul!

Við í stjórn FSFÍ viljum byrja á því að þakka fyrir góðan stuðning í baráttunni síðasta árið. Þetta er ungt félag en við höfum náð langt á stuttum tíma, og það er mjög margt á döfinni eins og er.

Starfsemi félagsins var að mestu undir yfirborðinu í haust, en við hófumst aðeins handa við að leggja drög að næstu ráðstefnu félagsins og pældum aðeins út hvað meira mætti gera. Þá héldum við góðu sambandi við erlenda samstarfsaðila: Freyr Gunnar Ólafsson fór í heimsókn til Software Freedom Law Center í New York, Smári McCarthy fór til Gautaborgar á FSCONS ráðstefnuna, sem verður aftur haldin 13-15 Nóvember næstkomandi, sjá http://www.fscons.org/ (fjölmennum!), og Tryggvi Björgvinsson fór á Free Culture ráðstefnuna í San Fransisco.

Í síðasta mánuði veitti þáverandi menntamálaráðherra okkur í FSFÍ sæti í höfundaréttarráði. Þetta er mikil viðurkenning fyrir okkur, og var ákveðið að sitjandi formaður skyldi taka sæti FSFÍ í ráðinu. Höfundaréttarráð starfar á grundvelli reglugerðar 500/2008 um starfsreglur höfundaréttarnefndar og höfundaréttarráðs, en nánar má lesa um það hér: http://www.reglugerd.is/interpro/dkm/WebGuard.nsf/key2/500-2008

Þá er FSFÍ líka komið í tengsl við samgönguráðuneytið í tengslum við tilraunir þeirra með rafrænar kosningar árið 2010.

Og í dag hélt FSFÍ í samvinnu við Íkon halda örnámskeið á vegum Skýrslutæknifélagsins þar sem fjallað var um frjálsan hugbúnað, opna staðla, og fleira.

Nú á næstunni er margt á döfinni:

Við höfum sent inn umsókn um að halda OpenOffice.org ráðstefnuna árið 2009 (og 2010 ef 2009 gengur ekki). Kosningarnar eru núna í gangi, en Ísland er í baráttu við Lettland, Ungverjaland, Ítalíu, Egyptaland, Indland og Filippseyjar. Sjá http://marketing.openoffice.org/ooocon2009/cfl/

Eftir rétt tæpar tvær vikur mun Eben Moglen koma aftur til landsins í þeim erindagjörðum að hjálpa íslenskum stjórnmálaflokkum að móta stefnu um upptöku frjáls hugbúnaðar í ríkisapparatinu. Óformleg könnun FSFÍ bendir til þess að úr ríkissjóði séu greiddar hundraðir milljónir króna árlega fyrir hugbúnað, en hvergi virðist það vera sundurliðað frá öðrum útgjöldum í fjárbókum stofnanna. Því miður verður ekki tími til að skipuleggja formlegan fyrirlestur í tengslum við komu Moglens að þessu sinni, en mögulega verður hægt að bjóða til samsætu félagsmanna; það verður þá nánar auglýst síðar.

Til að bæta enn um betur mun Mathias Klang (http://www.digital-rights.net), verkefnisstjóri Creative Commons í Svíþjóð koma til landsins viku síðar í tengslum við doktorsritgerð Tryggva Björgvinssonar, formanns FSFÍ. Þá mun FSFÍ nýta ferð hans til að bjóða til samdrykkju á einhverju öldurhúsi bæjarins þar sem Matthias mun fara með framsögu og því næst mun fólk geta flutt stutt erindi, og kannski náum við að koma á einhverjum ögn formlegri fyrirlestri í samvinnu við HÍ. Sendið póst á stjorn@fsfi.is ef þið viljið flytja erindi á samdrykkjunni – fyrstir koma, fyrstir fá.

Við erum einnig í upphafsstigum skipulagningar á Nordic Perl ráðstefnunni árið 2010. Það hefur verið áhugi hjá Perlurum að halda það hér og við erum að kanna möguleika á að samþætta það ráðstefnu okkar það árið. Þetta mál er algjörlega á upphafsstigum samt, og mikið verk er framundan.

Tryggvi Björgvinsson hefur verið að vinna í efni um stafrænt frelsi fyrir forsætisráðuneytið sem mun koma út í síðasta lagi um miðjan mars (sem handbók um stafrænt frelsi). Handbókin tekur fyrir stafrænt frelsi en leggur mesta áherslu á frjálsan og opinn hugbúnað og opna staðla. Í handbókinni verður að finna svör við flestum spurningum sem brenna á ríkisstarfsmönnum og landsbúum varðandi þessi umfjöllunarefni. Til dæmis er fjallað um sannmæli og öflun frjáls og opins hugbúnaðar, helstu skráarsniðsstaðlana og frjálsan og opinn hugbúnað, staða frjáls og opins hugbúnaðar og opinna staðla í öðrum löndum, reynslusögur frá Íslandi, drög að samningum við hugbúnaðarframleiðendur og margt fleira. Í allt mun handbókin, sem verður sett á ut.is (vef upplýsingatæknisamfélags
ráðuneytanna), vera samansett úr rúmlega 40 umfjöllunarefnum. Fyrst um sinn verður efnið sett statískt inn á vefinn en það er verið að skoða hvort hægt sé að tengja kvikukerfi (wiki) inn í núverandi kerfi UT vefsins en það verður samt ekki sett upp fyrr en seinna ef það kemst í gagnið. Efnið mun koma út undir frjálsu leyfi að sjálfsögðu.

Svo er undirbúningur að fara í alvöru gír fljótlega fyrir næstu ráðstefnu um stafrænt frelsi á Íslandi. Það er sannarlega mikið til að ræða um, þannig að það er um að gera að gera þetta með glæsibrag. Félagið stendur sæmilega vel fjárhagslega þrátt fyrir hremmingar peningamarkaðarins, og fyrirtæki í landinu hafa sýnt því áhuga að styrkja næstu ráðstefnu. Það sem vantar er sjálfboðaliða: til að gera ráðstefnuna sem veglegasta þarf öflugt teymi til að aðstoða við kynningarmál og annað sem ber á góma. Ef þið hafið áhuga á því að taka þátt, látið okkur vita: stjorn@fsfi.is

Með kærri kveðju frá skotgröfum frelsisstríðsins,

Stjórn FSFÍ
Tryggvi Björgvinsson
Smári McCarthy
Steinn E. Sigurðarson
Hallgrímur H. Gunnarsson
Freyr Gunnar Ólafsson

Hugbúnaður á réttu verði

Kjarninn í bankakrísunni hérlendis er að greiðsluþrot bættist ofan á ofvogun á fjármálamarkaði, sem er mjög algengt vandamál þegar litlar þjóðir taka stór stökk. Það sem úr verður er lausafjárskreppa þar sem ekki eru til nægir gjaldeyrisforðar til að greiða fyrir það sem þarf að greiða fyrir erlendis frá.

Nokkrar leiðir eru til til þess að draga úr gjaldeyrisútstremi, en tvær helstu eru aukning á útflutningi annars vegar og aðhald hinsvegar. Aðhald birtist í nokkrum myndum, en eitt form aðhalds er að minnkra bruðl – það er að segja, hætta að kaupa dýru vöruna í stað sambærilegrar ódýrari vöru.

Það er afar brýnt að Ísland sem heild hætti að borga erlendum fyrirtækjum fyrir það sem hægt er að fá ýmist hérlendis eða frítt.

Frjáls hugbúnaður er skilgreindur sem hugbúnaður þar sem leyfi höfundar er veitt til að nota hugbúnaðinn, læra af honum, deila honum með öðrum, og að bæta hann. Hugbúnaðarþörfum íslensks samfélags má mæta fullkomnlega með frjálsum hugbúnaði, sem kostar ekkert að flytja inn og er hægt að aðlaga alfarið að íslenskum þörfum, með þýðingum, staðfæringum og endurbótum svo fátt eitt sé nefnt.

Nýlega ákvað Microsoft, einn helsti hugbúnaðarframleiðandi heims, að sala á hugbúnaði til Íslands skyldi miðast við að gengið á evrunni væri 120 krónur, en þessi afsláttur er töluverður. Í ljósi þessa göfuga útspils eins ríkasta fyrirtækis heims eru framleiðendur á frjálsum hugbúnaði tilbúnir til að veita öllum íslenskum aðilum, opinberum sem einkaaðilum, fyrirtækjum sem einstaklingum, ókeypis og frjálsan aðgang að sínum vörum til eilífðarnóns, eins og hann hefur gert nú í áratugi.

Í dag eru vörur þær sem framleiddar eru undir formerkjum stafræns frelsis ótrúlega mörg: Linux stýrikerfið, OpenOffice skrifstofupakkinn, Firefox vafrinn, Apache vefþjónninn, MySQL gagnagrunnurinn og svo framvegis. En frjálsi heimurinn framleiðir ekki bara hugbúnað, heldur líka menningarverðmæti svo sem Wikipedia alfræðiritið, sem er stærsta og
ítarlegasta alfræðirit heims. Kvikmyndir, tónlist, og margt fleira er gefið út undir sambærilegum skilmálum við frjálsan hugbúnað, en undantekningarlaust er þar um að ræða vörur sem kosta ekki neitt.

Forsætisráðuneytið gaf fyrr á árinu út stefnu varðandi frjálsan hugbúnað, sem mætti hafa fengið mun meiri athygli. Það er tími til komið að einhver skoði þessa stefnu rækilega, og jafnvel íhugi hvort að hún sé ekki allt of mild í merkingu sinni. Punktarnir í stefnunni eru fimm:

1. Gæta skal þess að gefa frjálsum hugbúnaði sömu tækifæri og séreignarhugbúnaði þegar tekin er ákvörðun um kaup á nýjum búnaði og ávallt skal leitast við að gera sem hagstæðust kaup.

2. Leitast verði við að velja hugbúnað sem byggist á opnum stöðlum, hvort sem um staðlaðan búnað sé að ræða eða sérsmíðaðan. Opnir staðlar eru yfirleitt ráðandi í frjálsum hugbúnaði.

3. Stefnt verði að því að opinberir aðilar verði ekki of háðir einstökum hugbúnaðarframleiðendum og þjónustuaðilum. Notkun frjáls hugbúnaðar er liður í því.

4. Stefnt skal að því að hugbúnaður sem smíðaður er og fjármagnaður af opinberum aðilum, m.a. í rannsóknar- og þróunarverkefnum, verði endurnýtanlegur. Liður í því er að hugbúnaðurinn sé frjáls. Í upphafi slíkra verkefna skal gera áætlun um endurnýtingu hugbúnaðarins.

5. Stuðlað verði að því að nemendur í menntastofnunum landsins fái tækifæri til að kynnast og nota frjálsan hugbúnað til jafns við séreignarhugbúnað.

Þessi stefna er frábært skref í rétta átt, en þegar stefnan var samin var engin leið að vita að kostnaður vegna hugbúnaðarleyfa átti eftir að margfaldast sökum breytinga á efnahagsástandinu. Jafnvel með góðlátlegu
framtaki Microsoft þá hafa hugbúnaðarútgjöld fyrirtækja og ríkisstofnanna aukist til muna vegna fjármálaóreiðunnar, til dæmis vegna gagnagrunnskerfa, fjársýslukerfa, vefþjóna, póstþjóna, margmiðlunarhugbúnaðar og fleira.

Við verðum því að gera nýja og harðari kröfu. Það er klárt mál að það er ósanngjarnt að fólk greiði fyrir vöru þegar sambærilega eða betri vöru má fá frítt. Enginn sem hefur þekkingu á frjálsum og lokuðum hugbúnaði neitar því að frjáls hugbúnaður er í nær öllum tilfellum betri en séreignarhugbúnaðurinn.

Krafan er því einföld: Vilji framleiðendur séreignarhugbúnaðar halda áfram þátttöku í íslenskum efnahag verða þeir að lækka verðið á sínum vörum niður í núll, ekki bara strax, heldur til frambúðar.

Ástæðan er sú að hugbúnaður er afritaður án jaðarkostnaðar; það kostar ekkert að dreifa hugbúnaði umfram þá föstu upphæð sem kostaði að framleiða hugbúnaðinn í upphafi. Hægt er að ná fram sömu innlendu tekjum af sölu þjónustu við hugbúnað og fást við sölu hugbúnaðarins, og viðskiptalíkön fyrirtækja sem átta sig á þessum mikilvæga greinarmun eru ekki í neinni hættu. Mörg íslensk fyrirtæki hafa áttað sig á þessu, og fyrirtæki eins og CCP gætu í rauninni gert hugbúnaðinn sinn frjálsan án þess að fórna neinu. Þeirra tekjur koma ekki frá sölu hugbúnaðarins – þvert á móti gefa þeir hann frítt – heldur af sölu áskriftar að þjónustunni sem hugbúnaðurinn er; fólk kaupir sig inn í heim þann sem CCP rekur, og þar liggja verðmætin. Ef hugbúnaðurinn væri frjáls eru allar líkur á því að áhugasamir spilarar myndu leggja sitt að mörkum við að bæta hugbúnaðinn, sem yrði til bóta bæði fyrir fyrirtækið og spilaranna.

Erlendis hafa mörg fyrirtæki áttað sig á þessu líka. Sun Microsystems hefur á undanförnum árum frelsað sinn hugbúnað og gefið hann frítt, vitandi það að þeirra helstu tekjulindir eru af sölu á þjónustu annars vegar og vélbúnaði hinsvegar.

Það er mikilvægt fyrir íslensku þjóðina að fyrirtæki sem framleiða hugbúnað hætti að selja vörur sem kostar þá ekkert að afrita. Geri þeir það ekki, þá túlkast það sem árás á sjálfstæði þjóðarinnar nú á krepputímum. Þeirra vörur eru ekki af því taginu að tekið verður af þeim: þegar hægt er að afrita eitthvað óendanlega oft án þess að kostnaður hljótist af er hreinlega ósiðlegt að útiloka einhvern, hvað þá rukka leigu af því.

Fyrstu mótmælin sem framleiðendur og seljendur séreignarhugbúnaðar munu leggja fram við þessu er að rekstrarkostnaður á frjálsum hugbúnaði sé meiri en af séreignarhugbúnaði. Við þessu á ég til tvö svör.

Fyrsta svarið er að þetta er haugalygi. Í dag borgar Íslenska ríkið tugi, ef ekki hundruði milljóna króna árlega til Microsoft í leigu eða afnotagjöld af stýrikerfinu þeirra einu og sér, og ofan á það bætast margar tugir milljóna til viðbótar vegna skrifstofupakkans þeirra. Skólar og stofnanir greiða þá jafnframt fyrir sérfræðihugbúnað þó svo að yfirleitt sé til hliðstæður frjáls hugbúnaður.

Annað svarið er að mikill meirihluti af þeim peningum sem fara í að greiða fyrir reksturinn af séreignarhugbúnaði fer rakleiðis úr landi, en með frjálsan hugbúnað er hægt að halda öllu fjármagninu innan íslenska hagkerfisins og eiga afgang. Öllum tölvukerfum fylgir töluverð umsýsla, hvort sem framleiðandinn sé fyrirtæki eða sjálfboðaliðar. Með því að nota frjálsan hugbúnað geta kerfisstjórar séð um alla umsýslu án þess að neinn hluti kostnaðarins sé greiddur til erlendra aðila.

Þetta er því tillagan: Hættum að greiða fyrir hugbúnað.

Yrði Ísland fyrsta landið til að stíga þetta skref? Þvert á móti. Brasilía fór þessa leið fyrir nokkrum árum, sem og Kína. Stór hluti stjórnsýslu Californíu er keyrður á frjálsum hugbúnaði, og fjölmörg önnur ríki og sveitarfélög hafa hætt að greiða fyrir sinn hugbúnað. Á norðurlöndum hefur Skolelinux verkefnið unnið til fjölmargra verðlauna fyrir sín jákvæðu áhrif innan menntastofnanna. Smám saman er fólk allsstaðar í heiminum að uppgötva kosti þess að nýta sér afrakstur
samvinnu sjálfboðaliða um allan heim.

Í ofanálag við leyfisgjöldin hefur íslenska ríkið kostað þýðingu á Microsoft Windows, verkefni sem kostaði tugir milljóna. Ubuntu Linux dreifingin er nú 21% þýdd á íslensku, en þá er um að ræða þýðingu á öllum þeim þúsundum forrita sem fylgja kerfinu. Megnið af grunnkerfinu hefur þá verið þýtt, og þýðingarvinnan gengur mjög vel sem
samvinnuverkefni fjölmargra einstaklinga.

Sömuleiðis greiðir menntamálaráðuneytið fyrir aðgang allra íslendinga að vefútgáfu Encyclopedia Britannica, en á sama tíma er frjálsa samvinnuverkefnið Wikipedia mun oftar heimsótt af íslendingum, og það kostar engan neitt að fá aðgang að því. Íslenskun Wikipedia gengur einnig rosalega vel, en í íslensku útgáfunni eru nú rúmlega 24000 greinar.

Annað sem er hugsanlega mikilvægara til lengri tíma litið er að leggja til að íslensk fyrirtæki sem fara í gjaldþrot af hverskyns ástæðum frelsi allan þann hugbúnað sem þeir hafa skrifað ef nokkur er, þannig að kóðinn glatist ekki vegna gjaldþrotsins og megi hugsanlega endurnýtast annarsstaðar í samfélaginu. Það er líklegt að íslenskt samfélag hafi
orðið af hundruðum milljóna króna vegna hugbúnaðar sem hefur verið þróaður fyrir áhættufé og horfið svo inn í eilífðina vegna þess eins að fjármagn vantaði.

Ræða Eben Moglen af ráðstefnu um stafrænt frelsi 2008

Ræða Eben Moglens af ráðstefnu FSFÍ síðasta sumar er loksins orðin aðgengileg á netinu.

Aðalfundur FSFÍ

Aðalfundur FSFÍ verður haldinn í Borgarholtsskóla sunnudaginn 31. ágúst klukkan 14:00. Á fundinum verða málefni FSFÍ rædd, tillögur að lagabreytingum og framtíðaráform FSFÍ. Stjórn FSFÍ vonast til þess að sem flestir mæti á fundinn.

Útvarp Saga: Viðtal við Hallgrím H. Gunnarsson og Vinay Gupta

Þann 3. júlí var tekið viðtal við tvo fulltrúa FSFÍ, Hallgrím og Vinay, á Útvarpi Sögu. FSFÍ þakkar Útvarpi Sögu leyfið til endurbirtingar viðtalsins.

Ráðstefnan búin

FSFÍ vill þakka öllum þeim sem mættu á ráðstefnuna í gær og gerðu hana jafn frábæra og hún var.

Eben Moglen og John Perry Barlow á ráðstefnunni. Mynd: Ævar Arnfjörð Bjarmason. CC-SA. Flickr set.

Á næstu vikum munum við vinna úr upptökunum og koma þeim upp á netið. Hér eru komin nokkur sýnishorn:

John Perry Barlow talar um eðli lýðræðis á upplýsingaöld

Við fórum með John Perry Barlow og Eben Moglen út á Þingvelli í gær, 4. júlí, og tókum upp þetta myndband.

Ráðstefnan byrjar eftir þrjá tíma, og við hlökkum til að sjá alla þar.

Ráðstefna um stafrænt frelsi 2008

Þann 5. júlí næstkomandi stendur FSFÍ fyrir ráðstefnu um stafrænt frelsi í Gullteigssal á Grand Hótel Reykjavík. Úrvals fyrirlesarar koma hér saman á þennan einstaka viðburð sem er ætlað að vekja íslendinga til umhugsunar um eðli frelsis á upplýsingaöld. Aðalfyrirlesararnir eru Eben Moglen frá Software Freedom Law Center og John Perry Barlow frá Electronic Frontier Foundation. Auk þeirra verða aðrir innlendir og erlendir fyrirlesara með erindi sem snerta stafrænt frelsi í íslensku þjóðlífi og önnur málefni sem varða stafrænt frelsi á alþjóðavettvangi og samstarfi.

Dagskrá

12:00 Setning
Tryggvi Björgvinsson, formaður FSFÍ
12:30 Freedom to Think: The Role of Free Software in the Growth of the Human Mind
Eben Moglen, Software Freedom Law Center
14:00 The right to know
John Perry Barlow, Electronic Frontier Foundation
15:30 Kaffihlé
16:00 Opið umhverfi rafrænna skilríkja á Íslandi
Haraldur Agnar Bjarnason, Fjármálaráðuneytið
16:20 Ending Poverty with Open Hardware
Vinay Gupta og Lindsey Darby, Hexayurt inc.
16:40 Frjáls menning í skólastofunni
Salvör Gissurardóttir, Kennaraháskóli Íslands
17:00 Peering into the Future: Collaborative Models for Distributed Manufacturing
Andy McDonald, Center for Advanced Textiles, University of Glasgow
17:20 Íslensk wiki verkefni
Ævar Arnfjörð Bjarmason, Íslenski Wikimediahópurinn
17:40 Persónuvernd í opinni rafrænni stjórnsýslu
Haukur Arnþórsson, Háskóli Íslands
18:00 Ráðstefnuslit

Dagskrá ráðstefnu um stafrænt frelsi 2008 á pdf formi.

Um fyrirlesarana

Eben Moglen – Freedom to Think: The Role of Free Software in the Growth of the Human Mind

Eben Moglen er prófessor í lögum og sögu laga við Columbia háskólann í Bandaríkjunum og er stofnandi, aðalmálflutningsmaður og formaður Software Freedom Law Center sem er ætlað að vernda og styðja við frjálsan og opinn hugbúnað. Moglen hefur unnið mjög náið með Free Software Foundation og sat í stjórn stofnunarinnar frá árinu 2000 til ársins 2007.

Moglen er einn af lykilmönnunum í viðhaldi frjálsa hugbúnaðarleyfisins GNU General Public License. Listi námskeiða sem hann kennir eða hefur kennt inniheldur meðal annarra námskeiða lög í nútímasamfélagi, lög í netsamfélagi, saga enskra laga og saga bandarískra laga.

Moglen var einn af lögfræðingunum í vörn Philip Zimmermann varðandi útflutning á tölvuöryggi og árið 2003 hlaut hann Frumkvöðlaverðlaun Electronic Frontier Foundation. Moglen er vinsæll fyrirlesari um frjálsan hugbúnað og tengd lagaleg málefni og hefur haldið ræður um allan heim.

John Perry Barlow – The Right to Know

John Perry Barlow er þekktur baráttumaður frelsis í netheimum. Árið 1990 stofnaði hann ásamt Mitch Kapor og John Gilmore samtökin Electronic Frontier Foundation (EFF) og situr í stjórn samtakanna í dag. EFF eru þekkt alþjóðleg samtök sem berjast fyrir málfrelsi í netheimum á lagalegum grundvelli.

Barlow hefur skrifað fjölda greina sem birtar hafa verið af ýmsum ritum eins og til dæmis Communications of the ACM, Mondo 2000, New York Times og Time. Hann hefur verið driffjöður Wired tímaritsins frá stofnun þess. Grein hans “Hagfræði hugmyndanna” (e. The Economy of Ideas) er kennd í mörgum lagaskólum og “Sjálfstæðisyfirlýsing netheima” sem hann setti saman er birt á fjölda vefsíðna.

Árið 1999 valdi FutureBanker tímaritið Barlow sem “einn af 25 áhrifamestu aðilunum í fjármálaþjónustu.” Hann talar alþjóðlega fyrir ýmsum málefnum, sérstaklega stafrænni hagfræði, í ræðu, riti og ráðgjöf.

Haraldur Agnar Bjarnason – Opið umhverfi rafrænna skilríkja á Íslandi

Haraldur Agnar Bjarnason er sérfræðingur hjá fjármálaráðuneytinu og vinnur meðal annars að ýmsum málum er varða stefnumótun og notkun upplýsingatækni hjá ríkinu. Hann hefur tekið þátt í og starfar í ýmsum nefndum og verkefnahópum innan ríkisins sem fjalla um málefni tengd upplýsingatækni. Meðal annars situr Haraldur Agnar í verkefnastjórn um rafræna stjórnsýslu og í stjórn fagráðs um upplýsingatækni (FUT) sem er undir staðlaráði.

Haraldur Agnar vann áður hjá fjársýslu ríkisins þar sem hann var til að mynda innleiðingarstjóri nýrra fjárhags- og mannauðskerfa ríkisins. Þar á undan var hann fjármálastjóri fyrirtækisins InOrbit Entertainment sem vann að gerð tölvuleikja og starfaði í San Fransisco. Haraldur var einnig einn af stofnendum Miðheima (centrum.is) sem var eitt fyrsta internetþjónustufyrirtækið á Íslandi sem starfaði á almennum markaði.

Ásamt starfi sínu sem sérfræðingur hjá Fjármálaráðuneytinu er Haraldur Agnar að vinna að MS gráðu í viðskiptafræði frá Háskóla Íslands. BS ritgerð hans fjallaði um opinn hugbúnað og hét einfaldlega “OPEN SOURCE SOFTWARE”.

Haukur Arnþórsson – Persónuvernd í opinni rafrænni stjórnsýslu

Haukur Arnþórsson hefur starfað við upplýsingatækni í tæpa þrjá áratugi. Fyrst hjá Reiknistofnun Háskólans, en árið 1989 tók hann við starfi forstöðumanns upplýsinga- og tölvumála hjá skrifstofu Alþingis og gegndi því til 2004. Hann lýkur á árinu doktorsnámi í rafrænni stjórnsýslu
við HÍ og hefur hann á námstímanum einnig unnið í Evrópskum rannsóknarverkefnum á sviði rafrænnar stjórnsýslu og rafræns lýðræðis. Haukur er frumkvöðull við opnun opinberra gagna á Íslandi, en undir hans stjórn opnaði Alþingi vef sinn í júlí 1994 fyrst evrópskra þjóðþinga og birtir vefur Alþingis bæði upplýsingar um þingmál, þingræður og lagasafn Íslands.

Ævar Arnfjörð Bjarmason

Ævar Arnfjörð Bjarmason er einn af höfundum Mediawiki hugbúnaðarins og öðrum frjálsum hugbúnaðarverkefnum. Mediawiki hugbúnaðurinn er notaður í keyrslu á mörgum wiki-vefum, þó svo að upprunalega og þekktasta notkun hugbúnaðarins sé Wikipedia alfræðiritinu. Ævar hefur unnið að efni fyrir bæði ensku og íslensku útgáfu Wikipedia og er jafnframt einn af stjórnendum íslenska Wikipedia (í raun umsjónarmaður sem sér til þess að allt gangi vel fyrir sig). Ævar er vel þekktur í Wikimedia-samfélaginu sem vinnur ekki einungis að Wikipedia heldur einnig öðrum verkefnum eins og Wikiorðabók, Wikiheimildum svo að nokkur dæmi séu nefnd.

Ævar hefur einnig unnið talsvert að Perl túlkinum en Perl er mjög vinsælt frjálst forritunarmál, sérstaklega þekkt fyrir öfluga textavinnslu. Ævar hélt fyrirlestur á YAPC::EU 2007 ráðstefnunni en YAPC (Yet Another Perl Conference) er vel þekkt ráðstefnuröð í samfélaginu sem myndast hefur í kringum Perl forritunarmálið og er styrkt og eflt af The Perl Foundation. YAPC:EU er, eins og nafnið gefur til kynna, evrópski armur YAPC.

Salvör Gissurardóttir

Salvör Gissurardóttir er lektor við Kennaraháskóla Íslands og landsfrægur bloggari. Hún er leiðandi í stafrænni miðlun kennsluefnis á Íslandi. Salvör hefur lengi verið áhugasöm um frjálsan hugbúnað, þá sérstaklega notkun hans í kennslu. Salvör er til að mynda ein af stofnendum Ísfoss sem eru áhugamannasamtök um opinn hugbúnað í skólastarfi og hún situr í stjórn þess félags. Salvör hefur einnig verið dugleg að senda inn efni á Wikipedia og jafnframt notað wiki tæknina í kennslu og skólastarfi.

Vinay Gupta

Vinay Gupta er skosk-indverskur tölvunarfræðingur sem býr á Íslandi og vinnur við þróun á tækni fyrir flóttamannabúðir, þá einna helst Hexayurt skýlið. Hann starfaði áður hjá Rocky Mountain Institute og ritstýrði bókinni Winning the Oil Endgame.

Lindsey Darby

Lindsey Darby er umhverfisverkfræðingur sem vinnur að þróun frjálsra lausna fyrir þróunarlönd, þá aðallega hvað snýr að fátækt og sjálfbærni.

Andy McDonald

Andy McDonald er doktorsnemi við Center for Advanced Textiles í Glasgow háskóla. Hann hefur unnið að þróun hugmynda um innleiðingu frjálsra aðferða og dreifða samvinnu inn í viðskiptaáætlanir.

Styrktaraðilar FSFÍ

FSFÍ er fjármagnað að stærstum hluta með frjálsum framlögum fólks sem er umhugað um stafrænt frelsi. Einstaklingar sem styrkja FSFÍ falla í þrjá flokka eftir upphæðinni sem lögð er inn á bankabók FSFÍ:

• Stuðningsmenn frelsis eru styrktaraðilar sem leggja inn allt frá 1 krónu til 4999 króna.
• Baráttumenn frelsis eru styrktaraðilar sem leggja inn allt frá 5000 krónum til 14999 króna.
• Frelsishetjur eru styrktaraðilar sem leggja inn 15000 krónur eða meira.

Styrktaraðilar FSFÍ birtast á sérstakri styrktaraðilasíðu á vefsvæði FSFÍ. Haldið er utan um styrktaraðilana á ársgrundvelli þannig að hægt er að vera frelsishetja árið 2008 ef fjárhagur leyfir en stuðningsmaður frelsis árið 2009 ef þess gerist þörf. Styrktaraðilar hvers árs eru skráðir í sögubækurnar og listi hvers árs er aðgengilegur á vefsíðu FSFÍ. Það er ekki þörf á því að leggja inn alla upphæðina í einu. Það má til dæmis byrja sem baráttumaður frelsis með því að leggja inn 6000 krónur en svo seinna uppfæra sig í frelsishetju með því að leggja inn 10000 krónur til viðbótar áður en árið er á enda.

Fyrirtæki, stofnanir og félög sem styrkja og styðja við FSFÍ falla undir flokkinn Frelsissveitir. Þeirra stuðningur getur verið bæði fjárhagslegur eða í formi gífurlegrar aðstoðar í hinum ýmsu verkefnum sem félagið tekur sér fyrir hendur.

Vitaskuld mun FSFÍ gæta nafnleyndar þeirra sem óska þess sérstaklega en í stað þess mun þá Nafnlaus birtast í þessum fjórum flokkum sem hægt er að teljast til. Við hvetjum þó alla til þess að nafngreina sig því FSFÍ er umhugað um að sýna þakklæti sitt til þeirra sem styðja við stafrænt frelsi.

FSFÍ er félag sem starfar með ykkar hagsmuni að leiðarljósi og aðeins með ykkar hjálp er hægt að halda starfsemi og baráttu FSFÍ fyrir stafrænu frelsi á Íslandi gangandi. Við biðjum þig því að íhuga að gerast stuðningsmann frelsis, baráttumann frelsis eða frelsishetju og fyrirtæki að gerast frelsissveitir með því einu að leggja þá upphæð sem þér finnst þægileg inn á bankareikning FSFÍ.

Reikningsnúmer FSFÍ er 526-26-3638 og kennitala félagsins er 470308-1170 eins og sjá má hér til hliðar.

Þakka þér fyrir stuðninginn.