Inngangur
Nýtt: Ráðstefna um stafrænt frelsi 2010
Nýtt: IMMI – Icelandic Modern Media Initiative
Frjáls menning
Neysla og sköpun menningar fer í síauknum mæli fram í hinum stafræna heimi. Stafrænt frelsi er því æ mikilvægari forsenda þess að einstaklingar geti tekið virkan þátt í slíkri neyslu og sköpun.
Flestallt menningarefni er háð höfundarétti með einum eða öðrum hætti, hvort heldur sem það er gefið út undir frjálsum leyfum á borð við Creative Commons eða annars konar leyfi.
Eitt helsta viðfangsefni FSFÍ er hvernig útfæra megi höfundarétt í hinum stafræna heimi þannig að höfundar fái notið réttar síns til fulls án þess að þrengt sé að stafrænu frelsi almennings.
Frjáls tækni
Aðgangur að hinum stafræna heimi veltur á tækjabúnaði sem veitt getur slíkan aðgang. Einn þáttur í stafrænu frelsi snýr því að þeim tækjabúnaði sem hver og einn notar til þátttöku í hinum stafræna heimi.
Eitt af markmiðum FSFÍ er að standa vörð um frelsi notenda tækjabúnaðar til að hagnýta búnað sinn án ónauðsynlegra takmarkana af hálfu framleiðenda eða yfirvalda.
Frjáls þekking
Með tilkomu stafrænnar tækni er rutt úr vegi tæknilegum hindrunum við miðlun og öflun hvers kyns upplýsinga. Það er ekkert því tæknilega til fyrirstöðu að þekking mannkyns sé gerð öllum sem aðild eiga að hinum stafræna heimi aðgengileg.
Eitt af markmiðum FSFÍ er að vekja athygli á þeim tækifærum á sviði menntunar sem stafræn tækni býður upp á.
